ТОШКЕНТ, 25 янв — Sputnik. "Қодирия" бош сув иншооти ўз фаолиятини қайта бошлади. 5-6 соат оралиғида қувурлар тўлиб бўлгач, одатий иш режимига тушади, деб хабар қилди Уй-жой коммунал хизмат кўрсатиш вазирлиги.
Бўзсув иншоотидан Юнусобод, Мирзо Улуғбек, Учтепа, Шайхонтоҳур, Олмазор туманларига ва Чилонзор туманининг бир қисмига 3 соат ичида сув бериш тўлиқ тикланади.
Сурхондарё вилоятининг Денов, Сариосиё ва Узун туманларида ичимлик суви таъминоти тўлиқ ишга тушди.
Тошкент вилоятининг Олмалиқ, Ангрен, Чирчиқ, Оҳангарон шаҳарлари ҳамда Юқори Чирчиқ, Паркент, Бўстонлиқ туманларида ичимлик сув таъминоти тўлиқ ишга тушди.
Сирдарё вилоятидаги йирик Бешбулоқ ва Шимолий сув иншоотлари электр таъминоти билан таъминланди ва ишга туширилди.
Шунингдек, вазирлик аҳолига огоҳлантириш билан чиқди:
Хонадон ва бинолардаги иссиқлик тизими ва сув қурилмаларига эътиборли бўлинг;
Тизим ишга туширилмоқда, очиқ қолган жўмраклардан сув оқишининг олдини олинг;
Жўмракларни яна бир бор кўздан кечиринг.