ТОШКЕНТ, 10 янв — Sputnik. Халқаро террорчилик таҳдидларининг кучайиши Ўзбекистоннинг ва КХШТ давлатлари билан ҳамкорликни кенгайтириш заруриятини келтириб чиқармоқда, деб таъкидлади Г.В.Плеханов номидаги Россия иқтисодиёт унивеститети Тошкентдаги филиали доценти, сиёсатшунос Равшан Назаров Беларус президенти Александр Лукашенконинг сўзларини шарҳлаб.
Аввалроқ Лукашенко КХШТ кенгашининг навбатдан ташқари йиғилишида Ташкилот давлатлари Қозоғистондаги намойишлардан сабоқ олиши кераклигини айтган эди. Ўзбекистон бу ҳолатга алоҳида эътибор қаратиши кераклигини таъкидлади. Унинг сўзларига кўра, шундай айтиш учун тезкор маълумотлар мавжуд.
“Ўзбекистон КХШТ давлатлари, айниқса Россия билан ҳарбий-техник ҳамкорликни кенгайтириши ва ошириши керак, чунки халқаро террорчилик таҳдидлари жуда реал ва яқин келажакда улар зўрайиши мумкин”, — деди Назаров РИА Новости агентлигига.
Қозоғистондаги ҳозирги вазият - халқаро террорчилик мудрамаяпти, унинг “уйқудаги ячейкалар” исталган вақтда фаоллашиши мумкинлигининг тасдиғидир, деб ҳисоблайди эксперт. “Ёнилғи, озиқ-овқат ёки бошқа зарурий маҳсулотлар нархининг ошириш сингари кичик бир учқун кифоя”, - дейди Назаров.
У Ўзбекистонда “рангли инқилоб” уюштиришга реал уриниш 2005 йилнинг май ойида мамлакат шарқидаги Андижон вилоятида амалга оширилганини эслатди.
"Ўзбекистон буларнинг барчасини бошидан ўтказди ва синмади. Вазиятни беқарорлаштиришга қаратилган провокаторларнинг ҳар қандай уринишларини қайтариш учун Ўзбекистон Қуролли кучлари ва ҳуқуқ-тартибот идоралари етарли даражада куч ва малакага эга. Бироқ ҳаммаси таҳдидлар кўламига боғлиқ. Марказий Осиё давлатлари хавфсизлик умумминтақавий хусусиятга эга бўлишини англаши зарур", - деб қўшимча қилди Назаров.
Мавзуга доир сўнгги материаллар: