ТОШКЕНТ, 1 янв — Sputnik. Ўзбекистонда ноқонуний дарахт кесиш ҳолатларини фото ва видеотасвирга олиб жўнатган фуқароларга пул тўланади. Бу президент имзолаган “Республикада кўкаламзорлаштириш ишларини жадаллаштириш, дарахтлар муҳофазасини янада самарали ташкил этиш чора-тадбирлари тўғрисида”ги фармонда белгиланган.
Жамоатчилик назоратини кучайтириш мақсадида 2022 йил 1 апрелдан бошлаб дарахт, бута, ўсимлик ва ниҳолларни қонунга хилоф кесиш, кундаков қилиш, шикастлантириш, бошқа жойга кўчириб ўтқазиш бўйича ҳуқуқбузарликлар ҳақида фотосурат ва видеоёзувларни тақдим этган шахсларга пул тўланади.
Фуқаролар ҳар бир тасдиқланган ҳолат бўйича базавий ҳисоблаш миқдорининг (2022 йил 1 январь ҳолатига кўра БҲМ миқдори 270 минг сўм) бир бараварига тенг маблағ билан рағбатлантирилади.
Бунда:
маблағ ҳуқуқбузардан ундирилган жарима ҳисобидан тўланади;
фақат биринчи хабар берган шахс рағбатлантирилади;
сурат, видеоларни тақдим этганлар тўғрисидаги маълумотлар ошкор қилинмайди;
хабарлар “102” тезкор қисқа рақами ёки “Эконазорат” ахборот тизими орқали қабул қилинади.
Аввалроқ дарахтлар кесилишига мораторий муддатсиз даврга узайтирилгани хабар қилинган эди.
Мавзуга оид
Табиатга зарар етказганлик ҳақида хабар берган ўзбекистонликлар пул мукофоти олади
Коррупцияга қарши курашга муносиб ҳисса қўшганлар давлат мукофотига тавсия этилиши мумкин
Солиққа оид ҳуқуқбузарликларни аниқлашда ёрдам берганларни рағбатлантириш таклиф қилинди