ТОШКЕНТ, 28 дек - Sputnik. Санкт-Петербургнинг Пулково аэропортида Ўзбекистон президенти Шавкат Мирзиёевни Ленинград вилояти губернатори Александр Дрозденко ва бошқа расмий шахслар кутиб олди.
Ўзбекистон президенти 28 декабрь куни Санкт-Петербургда бўлиб ўтадиган Мустақил Давлатлар Ҳамдўстлигининг норасмий саммитида иштирок этиш ташриф буюрган.
Маълумот учун, Россия президенти Владимир Путин ташаббусига асосан амалга оширилаётган МДҲ етакчиларининг норасмий учрашувида Ўзбекистон, Тожикистон, Қирғизистон, Қозоғистон, Озарбайжон, Беларусь, Туркманистон ва Россия президентлари, Арманистон бош вазири, Қозоғистон биринчи президенти Нурсултан Назарбаевлар иштирок этишади.
Анъанага мувофиқ МДҲ раҳбарларининг норасмий учрашуви йил охирида бўлиб ўтади. Учрашув кун тартиби белгиланмаган ва у эркин муҳокама форматида бўлиб ўтади.
Айтиш жоизки бу пандемия бошланганидан сўнг амалга оширилган МДҲ давлат раҳбарларининг биринчи офлайн учрашуви бўлади.