ТОШКЕНТ, 26 дек – Sputnik. 20-25-декабрь кунлари Душанбе шаҳрида Ўзбекистон-Тожикистон Қўшма демаркация комиссиясида Ўзбекистон ва Тожикистон ҳукумат делегациялари ишчи гуруҳларининг учрашуви бўлиб ўтди.
Ўзбекистон ТИВ маълумотига кўра, музокаралар чоғида 2021 йилда ўтказилган топографик-геодезия, аэрофотосурат ва демаркация ишлари якунлари сарҳисоб қилинди ҳамда 2022 йилга мўлжалланган ишчи гуруҳлар йиғилишлари жадвали келишиб олинди.
Ишчи гуруҳларнинг навбатдаги учрашувини Ўзбекистон ҳудудида ўтказиш бўйича келишувга эришилди. Тадбир якунига кўра тегишли баённома имзоланди.
Эслатиб ўтамиз, 22-27 ноябр кунлари Наманган шаҳрида Тожикистон-Ўзбекистон қўшма демаркация комиссияси ишчи гуруҳлари навбатдаги йиғилиши бўлиб ўтган эди.
Маълумот учун, тожик-ўзбек чегарасининг узунлиги 1332 километрни ташкил қилади.