ТОШКЕНТ, 28 ноя — Sputnik. Ўзбекистон президенти Шавкат Мирзиёев Ашхобод шаҳрига жўнаб кетди. Бу ҳақда президент матбуот хизмати хабар бермоқда.
У ерда Мирзиёев Туркманистон президенти Гурбангули Бердимуҳамедовнинг таклифига биноан Иқтисодий ҳамкорлик ташкилотининг (ИҲТ) навбатдаги саммитида иштирок этади.
Тадбир кун тартибидан савдо, инвестициялар, "яшил" иқтисодиёт ва инновациялар, рақамли технологиялар, транспорт, логистика, туризм ва бошқа устувор йўналишларда кўп қиррали ҳамкорликни янада кенгайтириш масалалари ўрин олган.
Туркманистон пойтахтига ташриф доирасида давлат раҳбари қатор икки томонлама учрашувлар ҳам ўтказади.
ИҲТ минтақавий кўп томонлама тузилма бўлиб, минтақа мамлакатлари ўртасидаги яқин савдо-иқтисодий алоқаларни ривожлантиришга кўмаклашиш мақсадида 1985 йилда ташкил этилган.
Бугунги кунда ташкилотга Ўзбекистон, Туркия, Эрон, Покистон, Озарбайжон, Қозоғистон, Қирғизистон, Тожикистон, Туркманистон ва Афғонистон аъзо. Ўзбекистон унга 1992 йилда қўшилган.