ТОШКЕНТ, 27 ноя — Sputnik. Ўзбекистонда COVID-19нинг 4та штамми аниқланди.
Инновацион ривожланиш вазирлиги хабарига кўра, бу йилнинг боши ва I-чорагида коронавируснинг алфа штамми тарқалиши кузатилган бўлса, йил II ярмида эса дельта штамми кенг тарқалди.
"Ҳозирга келиб эса илгари қайд этилмаган янги мутациялар аниқланмоқда, бу босқичда маълумотлар умумлаштирилади ва уларнинг биоинформатик таҳлили, шунингдек, тадқиқот натижалари нашрга тайёрланади", — дейилган хабарда.
Илғор технологиялар маркази директори ўринбосари профессор Алишер Абдуллаевга кўра, республикада COVID-19нинг тўртта штамми мавжуд.
Уларнинг биттаси "асл" Ухань штаммига яқин, у коронавирусга чалинганларнинг тахминан 1 фоизида аниқланди. 20А штамми эса 7 ҳолатда кузатилмоқда. Шунингдек, яна бир тури "британча" штамм бўлиб, у эса тахминан 10 фоизда қайд этилган.
Беморларнинг 82 %дан ортиғи — дельта "ҳиндча" штамми билан зарарланди.