ТОШКЕНТ, 24 ноя - Sputnik. Чирчиқ олий танк қўмондонлик-муҳандислик билим юртида Россиялик ҳарбий мутахассислар ўзбекистонлик ҳарбийлар билан ҳаво мудофааси соҳасида тажриба алмашишди, деб хабар қилмоқда Мудофаа вазирлиги.
Россия Федерацияси Қуролли Кучлари мутахассислари Чирчиқдаги олий танк қўмондонлик-муҳандислик билим юртининг “Қуруқликдаги қўшинлар ҳаво ҳужумидан мудофаа” кафедраси офицерлари билан ўзаро тажриба алмашишди.
Хусусан россиялик ҳарбийларнинг Яқин Шарқ минтақасида олиб борилган ҳаракатларда орттирган жанговар тажрибалари таҳлил қилиниб, улардан соҳа бўйича мутахассисларни тайёрлаш жараёнида фойдаланиш масалалари муҳокама қилинди.
Меҳмонлар, шунингдек, билим юртида курсантларни соҳага тайёрлаш бўйича яратилган шарт-шароитлар билан танишиб уларни юқори баҳолашди.