ТОШКЕНТ, 24 ноя — Sputnik. Қозоғистон Республикаси ҳарбий делегацияси Тошкентдаги “Ғалаба боғи”га ҳамда "Чимён" тоғ тайёргарлиги ўқув-машқлар марказига ташриф буюрди, деб хабар қилмоқда Мудофаа вазирлиги.
Душанба куни Қозоғистон мудофаа вазири генерал-лейтенант Мурат Бектанов бошчилигидаги ҳарбий делегацияси Ўзбекистон Мудофаа вазирлигининг "Чимён" тоғ тайёргарлиги ўқув-машқлар маркази ва ва Қуролли Кучлар академияси фаолияти билан танишди.
Меҳмонлар ушбу марказ ҳамда етакчи олий ҳарбий таълим муассасасида ҳарбий хизматчиларнинг касбий профессионал маҳоратини такомиллаштиришга қаратилган моддий база ва яратилган замонавий шарт-шароитларни меҳмонлар алоҳида эътироф этишди.
Маълумот учун, Душанба куни Тошкентда Ўзбекистон мудофаа вазири генерал-лейтенант Баҳодир Қурбонов Қозоғистон мудофаа вазири генерал-лейтенант Мурат Бектановлар бошчилигидаги ҳарбий делегацияни қабул қилган эди.
Учрашувда қардош халқларнинг бирдамлиги, икки томонлама ҳарбий ва ҳарбий-техник ҳамкорлик масалаларининг жорий ҳолати ҳамда истиқболлари, минтақавий хавфсизлик масалалари муҳокама этилди ва махсус ҳужжатлар имзоланди.
Шу куннинг ўзида Қозоғистон ҳарбий делегацияси пойтахтимиздаги "Ғалаба боғи” ёдгорлик мажмуасида бўлиб, у ердаги “Матонат мадҳияси” мажмуаси пойига гулчамбар қўйди, боғ ичидан ўрин олган "Шон-шараф" музейидаги экспонатлар билан яқиндан танишди.