ТОШКЕНТ, 2 ноя — Sputnik. Тошкент вилоятидаги “Ойбек” чегара божхона постида йирик миқдорда гиёҳвандлик воситаларининг Ўзбекистонга олиб киришга бўлган уриниш фош этилди. Бу ҳақда Давлат божхона қўмитаси (ДБҚ) матбуот хизмати хабар берди.
Постда “DAF” юк автомобили божхона кўригидан ўтказилган. Ҳужжатларга кўра, узум ортилган автомашина республика ҳудудидан транзит тарзида ўтиб, Россияга етиб бориши лозим бўлган.
Божхоначилар автомобилнинг яширин бўлмаларга беркитилган елим идишларни аниқлашган. Уларда 149,76 килограмм гашиш, 4,44 килограмм опий ва 1,52 килограмм героин гиёҳвандлик воситалари бўлган.
Жами 156 килограммга яқин гиёҳвандлик воситалари мусодара қилинган.
Жиноят иши қўзғатилган. Суриштирув ишлари давом этмоқда.