ТОШКЕНТ, 28 окт - Sputnik. Бундан буён Сурхондарё вилояти ходимлари томонидан жамоат тартибини сақлашда қоидабузарларга электрошокер қўлланилади, деб хабар қилмоқда ИИВ матбуот хизмати.
Сурхондарё вилояти ИИВ ходимларига "Скорпион" русумли электрошокерлар тарқатилди. Қурилма резина таёқ, яъни "дубинка"га ўхшаш шаклда ишлаб чиқарилган бўлиб, ундан нафақат электрошок сифатида, заруратга қараб "дубинка" сифатида ҳам фойдаланиш мумкин.
Электрошокер инсон соғлиғига катта зарар етказмаган ҳолда уни вақтинча ҳаракатсизлантирш имконини беради. Электрошок таъсирида инсон танаси биринчи сонияда оғриқ зарбасини ҳис этса иккинчи сонияда мушаклар мувозанати йўқолишига олиб келади.
Лекин электрошокерни, кекса ёшдагилар, ногиронлиги аниқ кўриниб турган шахслар, ёш болалар, ҳамда ҳомиладор аёлларга нисбатан қўллаш тақиқланади. Фақат гуруҳ бўлиб ҳужум қилганда ушбу таъқиқ амал қилмайди.
ИИВ хабар қилишига кўра, Ўзбекистонда жамоат тартибини сақлаш билан шуғулланаётган инспекторларнинг зарур восита ва анжомлар билан таъминланиш моддий техник базаси йилдан йилга бойитиб борилмоқда.