ТОШКЕНТ, 7 окт – Sputnik. 2021 йилнинг 1 октябрь ҳолатига кўра, Ўзбекистон доимий аҳолиси сони 35 миллион 79 минг 200 кишини ташкил этмоқда. Бу ҳақда Давлат статистика қўмитаси маълумотлари дарак бермоқда.
Маълумотда келтирилишича, доимий аҳоли сони 2020 йилга нисбатан 2 % га ошган. Демак, Ўзбекистоннинг доимий аҳолиси сўнгги 30 йил ичида 13,9 млн. кишига ошган.
Эслатиб ўтамиз, Вазирлар Маҳкамасининг “Ўзбекистон Республикасида 2023 йилда аҳолини рўйхатга олишни ташкил этиш ва ўтказиш чора-тадбирлари тўғрисида”ги қарорига кўра, Ўзбекистонда 2023 йилнинг 1-25 ноябрларида аҳолини рўйхатга олиш тадбирларини ўтказиш кўзда тутилган.
Лекин мазкур кенг қўламли ишни амалга оширишдан аввал унинг синови бўлиб ўтиши ҳам белгиланган.
Хусусан, жорий йил 1-25 ноябрь кунлари Андижон, Хоразм, Тошкент вилоятларида ҳамда Тошкент шаҳрида аҳолини рўйхатга олиш тадбирлари эксперимент кўринишида бўлиб ўтади.