ТОШКЕНТ, 11 авг - Sputnik. Бухорода Ўзбекистон Кинематография агентлиги вакиллари ҳамда туркиялик киноижодкорлар ўртасида учрашув бўлиб ўтди, деб хабар қилмоқда Sputnik мухбири Ўзбекистон Кинематография агентлигига асосан.
Хорижлик меҳмонларнинг Ўзбекистонга ташрифи “Турк дунёси мамлакатлари: Ўзбекистон - Туркия. Кино саноати соҳасида мамлакатлар ўртасида ҳамкорлик ва копродукция шаклларини излаш" шиори остида бўлиб ўтмоқда.
Учрашув давомида бир қатор қўшма лойиҳаларни амалга ошириш юзасидан келишувларга эришилди. Шунингдек, туркларнинг “Ипак йўли дурдонаси” Тошкент халқаро кинофестивалидаги иштироки, тақдим этиладиган фильмлар сони ва мазмуни ҳам муҳокама этилди.
Тадбир якунида меҳмонлар учун Бухоронинг диққатга сазовор жойлари ҳамда шаҳар кинотеатрларига ҳам экскурсия уюштирилди.
Маълумот ўрнида айтиш мумкинки, “Ипак йўли дурдонаси” киноанжумани 1968 - 1997 йилларда мунтазам ўтказиб келинган "Осиё, Африка ва Лотин Америкаси мамлакатларининг Тошкент халқаро кинофестивали"ининг давомчиси ҳисобланади.
Бу йилги халқаро киноанжуман 28 сентябрдан 3 октябрга қадар бўлиб ўтиши режалаштирилмоқда ва унда Россия, Ҳиндистон, Қозоғистон, Белорус, Озарбайжон каби бир қатор давлатлар иштироки кутилмоқда.