ТОШКЕНТ, 8 авг - Sputnik. 9 август куни Токио-2020 ёзги Олимпия ўйинларида иштирок этаётган Ўзбекистон делегацияси ватанга қайтиб келади.
"Делегациямиз етиб келгач, Олимпиячиларимиз 21:00 да аэропортдан Миллий Олимпия қўмитаси томон “Бобур”, “Нукус”, “Ойбек”, “Ш.Рашидов”, “И.Каримов” кўчалари ва А.Темур хиёбони бўйлаб икки қаватли махсус автобусларда сайрга чиқишади", - дейилади Миллий Олимпия қўмитаси расмий хабарида.
Қўмита барча ўзбекистонликларни, ўзбек спорти ихлосмандларини Ўзбекистоннинг чинакам қаҳрамонларини қарши олишга, уларнинг унутилмас лаҳзаларида бирга бўлишга чорлаб қолган.
Эслатиб ўтамиз, Ўзбекистон Токио-2020 натижаларига кўра 3 та олтин, 2 та бронза медални қўлга киритди.
️Ўзбекистон медаллар бўйича Марказий Осиёда 1-ўрин; ️Туркий мамлакатлар орасида 1-ўрин; МДҲда 2-ўрин; ️Ислом мамлакатлари орасида 2-ўрин; ️Осиё мамлакатлари ичида 5-ўринни, бутун дунё бўйича эса 32-ўринни эгаллади.