ТОШКЕНТ, 1 авг — Sputnik. Сеулда Ўзбекистон ташқи ишлар вазири Абдулазиз Камилов Яшил ўсиш глобал институти (GGGI) Ассамблеяси раиси, Бирлашган Миллатлар Ташкилотининг собиқ бош котиби Пан Ги Мун билан музокаралар ўтказди. Бу ҳақда ТИВ матбуот хизмати хабар бермоқда.
Таъкидланишича, томонлар Ўзбекистон Мустақил Давлатлар Ҳамдўстлиги ҳудудида Яшил ўсиш глобал институтига биринчи аъзо давлат бўлганини мамнуният билан таъкидлади. Тошкентда GGGI нинг Марказий Осиёдаги биринчи ваколатхонаси очилди. Ўндан ортиқ қўшма тадбирлар амалга оширилди.
Шу муносабат билан Ўзбекистон ва GGGI ўртасидаги қатор соҳаларда ҳамкорликни янада ривожлантириш истиқболлари, жумладан, глобал иқлим ўзгариши оқибатларини юмшатиш, яшил иқтисодиёт технологияларини жорий этиш, қайта тикланадиган ва водород энергетикасини ривожлантириш масалалари муҳокама қилинди.
Учрашувда KOICA ва GGGI ўртасидаги қиймати 5,6 миллион АҚШ долларига тенг лойиҳа доирасида Орол денгизи минтақасининг экологик, ижтимоий-иқтисодий ва демографик ҳолатини яхшилаш бўйича ўзаро муносабатларга алоҳида эътибор қаратилди.