ТОШКЕНТ, 1 авг — Sputnik. Тошкентнинг Сергели тумани "Қўшқўрғон" маҳалласидаги омборхонада газ портлаши юз берди. Бу ҳақда Фавқулодда вазиятлар вазирлиги (ФВВ) матбуот хизмати хабар қилмоқда.
Хабарда ёзилишича, ёнғин 31 июль куни соат 19:30 ларда содир бўлган. Ҳодиса оқибатида корхона ходими ҳалок бўлган ва яна уч киши турли даражада тан жароҳатлари олиб, касалхонага ётқизилган.
Омборхонадан ташқари, ушбу корхонанинг офис бинолари қулаб тушган ва унга ёнма-ён жойлашган дўкон ҳам қисман зарар кўрган. Дастлабки маълумотларга кўра, портлаш хонага газ сизиб чиқиши оқибатида келиб чиққан.
Воқеа жойида ФВВ қутқарувчилари, ИИВ, Бош прокуратура ва бошқа тегишли идоралар вакиллари ишламоқда.