ТОШКЕНТ, 15 июл — Sputnik. Президент Шавкат Мирзиёевнинг таклифига биноан Покистон бош вазири Имрон Хон расмий ташриф билан Ўзбекистонга келди.
ЎзА хабарига кўра, Тошкент халқаро аэропортида олий мартабали меҳмонни мамлакат бош вазири Абдулла Арипов кутиб олди.
Таъкидлаш жоизки, бу Имрон Хоннинг Ўзбекисонга илк расмий ташрифидир.
Покистон бош вазирининг мазкур ташрифи кўп қиррали Ўзбекистон – Покистон шериклигини янги босқичга олиб чиқишда навбатдаги муҳим қадам бўлиши кутилмоқда.
Ташрифнинг асосий тадбирлари Кўксарой қароргоҳида бўлиб ўтади.
Покистон етакчиси, шунингдек, Ўзбекистон – Покистон бизнес форуми ва Тошкент шаҳрида ўтадиган “Марказий ва Жанубий Осиё: минтақавий боғлиқлик. Таҳдидлар ва имкониятлар” мавзусидаги халқаро конференцияда иштирок этиши, Самарқанд ва Бухоро шаҳарларини зиёрат қилиши кўзда тутилган.
Эслатиб ўтамиз, жорий йил 14 апрель куни президент Шавкат Мирзиёев ва Покистон бош вазири Имрон Хоннинг видеоанжуман шаклидаги учрашуви бўлиб ўтган эди.