ТОШКЕНТ, 12 июл — Sputnik. Ўзбекистон давлат чегаралари дахлсизлиги ҳеч қандай шубҳа остига қўйилмаслиги керак. Бу ҳақда 12 июль, душанба куни ўтказилган брифингда президент матбуот котиби Шерзод Асадов маълум қилди, деб хабар қилмоқда Sputnik мухбири.
Унинг сўзларига кўра, Афғонистонда вазият кескинлашгандан буён бир неча бор қўшни давлатнинг қуролланган ҳарбийлари мамлакат чегарасини ноқонуний бузиб ўтмоқчи бўлган. Шу пайтга қадар уларнинг умумий сони 150 кишига етган. Уларнинг ҳаммаси зарурий суриштирув ва тергов тадбирлари ўтказилганидан сўнг ўз давлатига қайтариб юборилган. Ҳозирги кунда Ўзбекистон ҳудудида бирорта Афғонистон фуқароси ноқонуний бошпана топмаган.
Олдин айтиб ўтганимдек, чегараларимиз дахлсизлиги ҳеч қандай шубҳа остига қўйилмаслиги керак. Ҳеч қандай ноқонуний ўтишларга бизлар йўл қўймаймиз.
Президент матбуот котиби Ўзбекистон икки давлат ўртасидаги яхши қўшничилик муносабатларини янада ривожлантиришдан манфаатдорлигини таъкидлади.
“Афғонистонда бўлаётган ҳозирги тўқнашувлар ва зиддиятлар Афғонистоннинг ички иши ва биз бунга аралашмаслик тарафдоримиз”, - дея хулоса қилди у.