ТОШКЕНТ, 29 июн — Sputnik. Тошкент шаҳри Яшнобод туманида фуқарони ижтимоий тармоқларда шарманда қилиш билан қўрқитиб, пул ундирган аёл ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти матбуот хизмати хабар қилди.
Маълум бўлишича, Г. исмли аёл фуқаро Б. билан бирга ишқий муносабатда бўлган фото ва видеоларни ижтимоий тармоқларда тарқатиш билан қўрқитган. Тарқатмаслик эвазига 85 млн сўм талаб қилган. Шундан 10 млн сўмини ўзига тегишли бўлган пластик картага ўтказиб олган вақтида ушланган.
Бундан ташқари, Г. жорий йилнинг март ойидан шу кунга қадар Б.нинг 200 млн сўмдан ортиқ пулини товламачилик йўли билан қўлга киритганлиги аниқланган. Бунда ҳам суратлар ва видеоларни тарқатиш билан қўрқитган.
Ҳолат юзасидан Жиноят кодексининг 165-моддаси (Товламачилик) билан жиноят иши қўзғатилган.