ТОШКЕНТ, 29 июн — Sputnik. Навоий вилояти Конимех туманида “Cobalt” ва юк машинаси иштирокида йўл-транспорт ҳодисаси содир бўлди.
Вилоят ЙҲХБ матбуот хизмати хабарига кўра, ҳодиса 27 июнь куни соат 14:30 ларда туман ҳудудидан ўтган А-379 Навоий—Учқудуқ—Зарафшон халқаро аҳамиятга эга автомобиль йўлида рўй берган.
“Cobalt” ҳайдовчиси Ў.Қ. йўлда чарчоқ оқибатида рулда ухлаб қолган. Натижада қарама-қарши йўлдан келаётган HOWO Sinotroc русумли махсус (чиқинди ташувчи) автомашина билан тўқнашиб кетган.
Ҳодиса оқибатида “Cobalt” ҳайдовчиси ва автомашина олд ўриндиғида йўловчи сифатида кетаётган унинг отаси, нафақахўр Р.Қ. олган оғир тан жароҳатлари туфайли воқеа жойида вафот этган.
Ҳайдовчининг орқа ўриндиғида бўлган турмуш ўртоғи З.Ш. тан жароҳати олиб, Конимех туман тиббиёт бирлашмасининг жонлантириш бўлимига ётқизилган.
Мазкур ҳолат юзасидан Конимех туман ИИБ томонидан дастлабки тергов ҳаракатлари олиб борилмоқда.