ТОШКЕНТ, 17 июн — Sputnik. “Uzbekistan Airways” авиакомпанияси 18 июндан Тошкент ва Деҳли ўртасидаги авиақатновларни бекор қилади. Бу ҳақда компания матбуот хизмати хабар қилди.
Бу қарорни коронавирусга қарши курашиш республика махсус комиссияси Ҳиндистондаги эпидемиологик вазият сабаб қабул қилган.
“18 июндан бошлаб “Uzbekistan Airways” АЖ ҳафтанинг жума кунлари амалга ошириладиган Тошкент–Деҳли–Тошкент йўналиши бўйича авиақатновларни бекор қилади”, - дейилган хабарда.
Йўловчиларга авиачипта пуллари қайтариб берилади.
Ҳиндистонда пандемия бошлангандан буён коронавирус юқтириб олганлар сони 29,5 миллиондан ошган. Шулардан 28,1 миллиони соғайган. 374 мингдан зиёд киши вирус қурбонига айланган.
Шунингдек, мамлакатда коронавирусни бошдан кечирганларда моғор касаллиги аниқланмоқда. “Қора”, “оқ” ва “сариқ” моғорга “яшили” ҳам қўшилган.