ТОШКЕНТ, 16 июн – Sputnik. АҚШ ва Россия президентлари Жо Байден ва Владимир Путиннинг Женевадаги учрашуви чоршанба куни Москва вақти билан 14.35да бошланади. Бу ҳақда Оқ уй томонидан тарқатилган Байденнинг кундалик иш тартибида кўрсатиб ўтилган.
Учрашув бошланишидан 10 дақиқа олдин Байден Путин ва Швейцария президенти Ги Пармелен билан суратга тушади.
Байден ва Путиннинг делегация иштирокидаги кенгайтирилган учрашуви Москва вақти билан 15.55да бошланади, 17.40да ушбу учрашувнинг иккинчи раунди ўтказилади.
Путин билан учрашувдан сўнг Байден матбуот-анжумани ўтказади, дея тасдиқлаган Оқ уй.
Шунингдек, хабарда қайд этилишича, АҚШ президенти Жо Байден Женевада россиялик ҳамкасби Владимир Путин билан учрашувидан сўнг дарҳол Европа турнесидан қайтади.