ТОШКЕНТ, 14 июн - Sputnik. Ўзбекистонда "Навқирон Ўзбекистон" иқтидорли ёшлар республика замонавий санъат кўргазмаси бўлиб ўтди.
"Навқирон Ўзбекистон" республика замонавий санъат кўргазмасининг асосий мақсад ва вазифалари замонавий санъатнинг барча соҳаларида ижод қилаётган ёш рассомларнинг салоҳиятини қўллаб-қувватлаш ва очишга, шунингдек, уларнинг ижодларини кенг тарғиб қилишга қаратилган.
Шунингдек, Қорақалпоғистон Республикаси, вилоятлар ва Тошкент шаҳрида ижод қилаётган ёшларнинг ижодий ва интеллектуал салоҳиятини рўёбга чиқариш, тасвирий санъат, дизайн соҳасидаги маҳорати билан одамларнинг юрагига етиб борадиган, ёшларни эзгуликка чорлайдиган, уларни маънавий баркамол инсонлар қилиб тарбиялашга хизмат қиладиган асарлар яратишда фаоллик кўрсатаётган 23 ёшдан 35 ёшгача бўлган иқтидорли ёшларни қўллаб-қувватлаш ва рағбатлантиришдан иборат.
Республиканинг барча ҳудудларидан юборилган ижодий ишлар биринчи навбатда Ишчи гуруҳ томонидан сараланди ва кўргазмада намойиш этиш учун тавсия этилди.
Кўргазмада намойиш этилаётган ижодий ишлар Ҳакамлар ҳайъати томонидан баҳоланади ва ғолиблар аниқланади. Бундан ташқари ҳар бир йўналиш бўйича рағбатлантирувчи номинациялар белгиланади.
Танловнинг ёпилиш маросимида ғолиблар "Навқирон Ўзбекистон" республика замонавий санъат кўргазмасининг Олтин, Кумуш ва Бронза медаллари, Диплом ва қимматбаҳо совғалар билан тақдирланади. Шунингдек, кўргазма иштирокчиларига Сертификат топширилади.
Ўзбекистон Рассомлар Уюшмаси санъатшунослар бўлимининг раиси Aҳмедова Элмира "Навқирон Ўзбекистон" кўргазмасининг куратори сифатида иштирок этади.
"Навқирон Ўзбекистон" республика замонавий санъат кўргазмаси ғолибларини тантанали тақдирлаш маросими 30 июнда Марказий кўргазмалар залида бўлиб ўтади.