ТОШКЕНТ, 30 май — Sputnik. Италиянинг Песаро шаҳрида бадиий гимнастика бўйича Жаҳон кубогининг тўртинчи босқичи якунланди. Унда ўзбекистонлик гимнастикачи Сабина Тошкенбоева Токио-2020 Олимпия ўйинларига йўлланмани қўлга киритди.
Миллий олимпия қўмитаси хабарига кўра, барча босқичлар якуни бўйича Тошкенбоева 130 балл жамғаришга муваффақ бўлди. Бу лицензия учун курашаётган спортчилар орасида иккинчи кўрсаткич: Екатерина Веденеева (Словения) – 145, Сабина Тошкенбоева (Ўзбекистон) – 130, Чисаки Оива (Япония) – 118.
“Бу бадиий гимнастика бўйича Токио-2020 Олимпия ўйинларига қўлга киритилган биринчи лицензия ҳисобланади”, - дейилган хабарда.
Таъкидланишича, олдинда гуруҳ машқи бўйича ўзбекистонлик гимнастикачиларни Тошкентда ўтадиган лицензион Осиё чемпионати кутиб турибди.