ТОШКЕНТ, 29 май - Sputnik. Хоразмда "Нексия" автомобили ҳайдовчиси бошқарувни йўқотиши натижасида мудҳиш йўл-транспорт ҳодисаси содир бўлди, тўрт киши ЙТҲ қурбонига айланди. Бу ҳақда "Хоразм" телеканалининг "Жиноят ва адолат" кўрсатувида маълум қилинди.
Хабарда айтилишича, Янгиариқ тумани "Аччиқуйи" маҳалласида яшовчи 1982 йилда туғилган шахс 24 май куни кечга томон "Нексия-2" автомобилини бошқариб кетаётиб Янгиариқ—Хонқа йўлининг 14-километрида йўл четидаги тумандаги мактабларнинг бирида таҳсил олувчи 6 нафар 11-синф битирувчиларини уриб юборган.
Автомобилнинг ўзи эса йўл ёқасидаги ариққа ағдарилиб тушган.
Авария оқибатида жабрланувчиларнинг 3 нафари воқеа жойида, яна бир нафари эса шифохонада олган тан жароҳатлари оқибатида вафот этган. Шунингдек, икки нафар ўқувчи оғир тан жароҳатлари билан шифохонага жойлаштирилган.
Ҳайдовчига нисбатан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми билан жиноят иши қўзғатилиб, дастлабки тергов ҳаракатлари олиб борилмоқда.