ТОШКЕНТ, 23 май — Sputnik. Тошкент вилояти Қибрай туманига қарашли 20 та маҳалла фуқаролар йиғини (жами 4 402 гектар) Тошкент шаҳри таркибига ўтказилиши мумкин.
Тошкент вилояти ИИББ ахборот хизмати раҳбари Бобур Тўлагановнинг маълум қилишича, бу ҳақда жорий йил 20 май куни Халқ депутатлари Қибрай туман кенгашининг тегишли қарори қабул қилинган.
Жумладан:
Қибрай туманидаги Жарбоши, Ташисти, Ибрат, Миришкор, Арғин, Баҳор, Чинор ва Товкентепа маҳаллалари (2 107,4 гектар) пойтахтнинг Яшнобод тумани;
Геофизика, Алишеробод, Чингелди, Дўстлик, Тараққиёт, Баркамол, Боғишамол, Ватанпарвар, Амир Темур, Мевазор, Гулбоғ, Гулзор-1 ва Пастки-юз маҳаллалари (2 294,6 гектар) Мирзо Улуғбек тумани таркибига ўтказилади.
Эслатиб ўтамиз, ўтган йил августида президент Шавкат Мирзиёев Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишган эди.