ТОШКЕНТ, 12 май - Sputnik. Тошкент ва Пекин "Хитой - Қирғизистон - Ўзбекистон" темир йўлини лойиҳалаштириш ва қуриш ишларини жадаллаштиришга келишиб олишди, деб хабар қилмоқда Ўзбекистон ТИВ матбуот хизмати.
2021-йилнинг 11-май куни Ўзбекистон Республикаси Ташқи ишлар вазири Абдулазиз Камилов Циан шаҳрида Хитой Халқ Республикаси Давлат кенгаши аъзоси, Ташқи ишлар вазири Ван И билан учрашди.
Музокаралар чоғида “Хитой – Қирғизистон – Ўзбекистон” мултимодал транспорт маршрутини ривожлантириш ва “Хитой – Қирғизистон – Ўзбекистон” темир йўлини қуриш лойиҳасини биргаликда ҳаётга татбиқ қилиш бўйича тезроқ амалий чоралар кўришнинг долзарблиги қайд этилди, - дейилган хабарда.
Ундан ташқари вазирлар халқаро ва минтақавий ташкилотлар доирасидаги ҳамкорлик, минтақавий хавфсизликни таъминлаш, Афғонистонда мустаҳкам тинчликка эришишга ва унинг иқтисодиётини тиклашга кўмаклашиш механизмларини ҳам муҳокама қилишди.