ТОШКЕНТ, 26 апр — Sputnik. Фавқулодда вазиятлар вазирлиги аҳоли устига сув сепиб, дезинфекция ишлари амалга оширилгани юзасидан муносабат билдирди.
Аввалроқ ижтимоий тармоқларда ёнғин ўчириш машиналари кўчаларга сув сепаётгани акс этган видеолар кенг тарқалган эди.
ФВВнинг аниқлик киритишича, бу ҳодиса Андижон вилояти Марҳамат ва Сурхондарё вилояти Денов туманларида рўй берган.
Аниқланишича, коронавирус инфекцияси тарқалишининг олдини олиш мақсадида дезинфекция ишлари шошилинч, тартибсиз ҳолда амалга оширилган.
Вазирлик мазкур ҳолатни тўлиқ назоратга олган ва ҳозирда суриштирув ишлари олиб борилмоқда.
“Ҳодиса юзасидан ўрганиш якунлари бўйича тегишли ходимларга интизомий таъзир чоралари кўрилади”, - дейилган хабарда.