ТОШКЕНТ, 25 апр — Sputnik. Арманистон бош вазири Никол Пашинян республикада навбатдан ташқари парламент сайловлари ўтказилиши учун истеъфога чиқди. Бу ҳақда сиёсатчи Facebook᾽да эфирга узатилган мурожаатида маълум қилди.
“Президент ва сиёсий кучлар билан келишувга кўра, бугун мен 20 июнь куни навбатдан ташқари парламент сайловлари ўтказилиши учун истеъфога чиқаман”, - деди у .
Шу билан бирга, Пашинян бош вазир вазифасини бажарувчи мақомига қарамасдан, ҳукумат раҳбари ваколатларини тўлиқ бажаришини таъкидлади.
“Конституция ва қонунларга мувофиқ, мен навбатдан ташқари парламент сайловлари ўтказилишига қадар бош вазир вазифасини тўлиқ бажараман”, - дея қўшимча қилди Пашинян.
Эслатиб ўтамиз, аввалроқ Арманистон бош вазири Никол Пашинян апрель ойида кетиш учун эмас, балки навбатдан ташқари сайловлар бўлиб ўтиши учун истеъфога чиқишини маълум қилган эди.