ТОШКЕНТ, 22 апр — Sputnik. 23 апрель куни Тожикистон катта Ҳисор канали орқали Сурхондарё вилоятига сув ўтказилишига келишиб олинди. Бу ҳақда вилоят ҳокимлиги матбуот хизмати хабар қилмоқда.
Куни кеча Сурхондарё вилояти ҳокими Тўра Боболов бошчилигидаги делегация Тожикистонга ташриф буюриб, катта Ҳисор каналини реконструкция қилиш ишлари билан яқиндан танишган.
“Қўшни мамлакат делегацияси аъзолари билан бўлган мулоқот якунида жорий йилнинг 23 апрель куни Тожикистондан катта Ҳисор канали орқали Сурхондарё вилоятига сув ўтказилишига келишиб олинди”, - дейилган хабарда.
Президент Шавкат Мирзиёевнинг Тожикистонга илк ташрифида катта Ҳисор каналида 2019-2021 йиллар давомида каналнинг 50,8 км қисмида 530 минг м3 тупроқ, 600 м3 бетон, 2,7 минг м3 тош ишларини амалга ошириш келишиб олинган эди. Бундан Сурхондарё вилоятида сув танқислигини юмшатиш, қишлоқ хўжалиги экин майдонларига кафолатли сув етказиб бериш мақсад қилинган эди.
2021 йилда вилоят ҳокимлиги каналнинг қолган 13,3 км қисмини реконструкция қилиш ишларига 4,2 млрд сўм маблағ ажратган. Канални тозалаш ишларига 10 та экскаватор, 3 та юк ташувчи техникалар жалб этилган. 652 минг.м3 тупроқ, 2,7 минг.м3 тош ҳамда 1100 м3 бетон ишлари амалга оширилган.
Шунингдек, 12 дона редуктор ва вент-кўтаргичларлар янгисига алмаштирилиб, Қоратоғ дарёсига сув ташлаш гидротехник иншоотининг сув ўтказиш қобилияти 45 м3/сек етказилган.