ТОШКЕНТ, 15 апр - Sputnik. Швецияда Ўзбекистон дипломатик ваколатхонаси ташкил этилади. Бу ҳақида Ўзбекистон Президенти Шавкат Мирзиёевнинг ЕХҲТнинг амалдаги раиси, Швеция ташқи ишлар вазири Анн Линде билан учрашувида маълум бўлди.
Шавкат Мирзиёев Швецияда Ўзбекистоннинг дипломатик миссиясини ташкил этиш икки давлат ўртасидаги ва умуман Ўзбекистон ва скандинав давлатлари ҳамкорликнинг мавжуд салоҳияти ва кенг имкониятларини рўёбга чиқаришга хизмат қилишига ишонч билдирди.
Шунингдек, учрашувда Ўзбекистон-Швеция орасида таълим соҳасида ҳамкорлик қилиш, Швеция етакчи компанияларининг инновациялари ва инвестицияларини мамлакатимизга жалб этиш, савдо ва кооперация алоқаларини кенгайтириш - муносабатларнинг муҳим йўналишлари экани таъкидланди.
Ундан ташқари учрашувда Ўзбекистон ЕХҲТ билан конструктив шерикликни ривожлантириш, хусусан, Демократик институтлар ва инсон ҳуқуқлари бўйича бюроси ва Парламент ассамблеяси билан сермаҳсул мулоқотни давом эттиришдан манфаатдор экани қайд этилди.
Анн Линде илиқ қабул ва очиқ суҳбат учун самимий миннатдорлик билдирди ва Ўзбекистонда янги босқичда амалга оширилаётган демократик янгиланишлар ва ижтимоий-иқтисодий ислоҳотларни, шунингдек, Марказий Осиё минтақасида яхши қўшничилик муносабатларини мустаҳкамлаш борасидаги сиёсатни юқори баҳолади ва қўллаб-қувватлади.