ТОШКЕНТ, 15 апр – Sputnik. Ўзбекистон ва Покистон транспорт-логистика соҳасида ҳамкорликни чуқурлаштиради. Ушбу масала Шавкат Мирзиёев ва Покистон бош вазири Имрон Хоннинг видеоанжуман шаклидаги учрашувида муҳокама қилинди.
Суҳбат давомида, хусусан икки давлатнинг Трансафғон темир йўлини стратегик лойиҳаси доирасида амалга оширилаётганм ҳамкорлик масалалари муҳокама қилинди.
Шунингдек, транспорт ва транзит соҳасидаги устувор лойиҳаларни илгари суриш, товар айирбошлашни кўпайтириш ва ишлаб чиқариш кооперациясини кучайтириш учун қулай шароитларни яратиш учун қўшимча чоралар кўриш, жумладан, имтиёзли савдо тўғрисида битим ва иқтисодиётнинг асосий тармоқларида ҳамкорлик бўйича “йўл харитаси”ни қабул қилиш, қўшма ишбилармонлик форумларини ўтказиш юзасидан келишувларга эришилди.
Ундан ташқари, Ўзбекистон ва Покистон орасида авиақатновларни тиклаш масаласи, ўрганиб чиқилди.
Учрашувда муҳокама қилинган яна бир муҳим масала - Афғонистондаги вазиятни тинч йўл билан тез фурсатда ҳал этиш масалаларига алоҳида тўхталди. Ушбу мамлакатнинг жадал иқтисодий тикланишига қаратилган саъй-ҳаракатлар қўллаб-қувватланди.
Учрашув якунида Қўшма баёнот қабул қилинди ҳамда стандартлаштириш ва метрология, қишлоқ хўжалиги ва бошқа соҳаларда қатор муҳим ҳужжатлар имзоланди.