ТОШКЕНТ, 12 апр — Sputnik. Ўзбекистон ташқи ишлар вазири Абдулазиз Камилов Россиянинг фавқулодда ва мухтор элчиси этиб тайинланган Олег Мальгиновни қабул қилди. Бу ҳақда ТИВ матбуот хизмати хабар қилди.
Камилов Россиянинг янги элчисидан ишонч ёрлиқлари нусхасини қабул қилиб олди ва Ўзбекистондаги фаолият бошланиши билан табриклади.
Учрашув давомида томонлар Ўзбекистон-Россия стратегик шериклик муносабатларининг ҳозирги ҳолати ва ривожланиш истиқболлари, шунингдек, халқаро ташкилотлар доирасидаги ҳамкорлик масалаларини муҳокама қилди.
Таъкидланишича, олий ва юқори даражада бўлажак тадбирлар жадвали ва кун тартиби кўриб чиқилган. Шунингдек, минтақавий ва халқаро масалалар юзасидан ҳам фикр алмашилган.
Эслатиб ўтамиз, 5 март куни Россия президенти Владимир Путин фармонига мувофиқ, Олег Мальгинов мамлакатнинг Ўзбекистондаги янги элчиси этиб тайинланган эди.