ТОШКЕНТ, 6 апр — Sputnik. Корея Халқ Демократик Республикаси (КХДР) Токиода бўлиб ўтадиган ёзги Олимпия ўйинларида иштирок этмайди. Бу ҳақда РИА Новости “Sports in DRP Korea” порталига таянган ҳолда ёзмоқда.
Хабарда ёзилишича, мамлакат Олимпия қўмитаси йиғилишида Токиодаги Олимпия ўйинларида коронавирус пандемияси сабаб иштирок этмаслик тўғрисида қарор қилинган.
“... Спортчиларни хавфли вирус (коронавирус — таҳр.) сабаб келиб чиққан глобал соғлиқни сақлаш инқирозидан ҳимоя қилиш мақсадида XXXII-Олимпия ўйинларида қатнашмасликка қарор қилинди”, - дейилган хабарда.
Коронавирус пандемияси сабаб Токио Олимпиадаси 2020 йилдан 2021 йилга қолдирилган эди. Бу йилги ўйинлар 23 июлдан 8 августга қадар бўлиб ўтади. Олимпиада ташкилий қўмитаси COVID-19 тарқалиши хавфи сабаб Японияда ўйинларни хорижлик томошабинларсиз ўтказишга қарор қилган.