ТОШКЕНТ, 6 апр — Sputnik. Самарқанд шаҳрида бир қизнинг шахсий суратларини тарқатиб юбормаслик учун пул талаб қилган шахс ушланди. Бу ҳақда Тергов департаменти хабар қилди.
Маълум қилинишича, 2 апрель куни 21 ёшли С.А. шаҳар ИИБга ариза билан мурожаат қилган. Қизнинг сўзларига кўра, унинг обрўли институтлардан бирида ўқитувчи бўлиб ишловчи таниши унга тегишли шахсий суратларни ижтимоий тармоқларга тарқатиб юбориш билан таҳдид қилган. Тарқатмаслик эвазига эса қиздан 400 доллар талаб қилган.
27 ёшли В.Ф. ўша куни қиздан товламачилик йўли 400 долларни олган вақтида ушланган.
В.Ф.га нисбатан Ўзбекистон Жиноят кодексининг 165-моддаси 1-қисми (Товламачилик) билан жиноят иши қўзғатилган.
Ҳозирда тергов ҳаракатлари олиб борилмоқда.
Эслатиб ўтамиз, аввалроқ Тошкент шаҳрида товламачиликка қўл урган она ва қиз қўлга олингани хабар қилинган эди.