ТОШКЕНТ, 29 мар — Sputnik. 2021 йилнинг 29 март куни Фарғона нефтни қайта ишлаш заводи (НҚИЗ) “Eвро-4” стандартидаги дизель ёқилғисининг илк партияси Ўзбекистон товар-хом ашё биржаси орқали савдога қўйилди. Бу ҳақда завод матбуот хизмати хабар қилмоқда.
Маълумки, илгари ушбу заводда ишлаб чиқарилаётган дизель ёқилғиси сифати “Eвро-2” стандартидан ошмасди. Ушбу ёқилғининг сифатини дунё стандартларига мослаштириш мақсадида уни модернизасия қилиш дастурининг биринчи босқичи доирасида дизель ёқилғисини гидротозалаш қурилмаси (ГДС) катализатори Франциянинг “Axens” компаниясининг янги ва анча замонавий катализаторига алмаштирилди.
Таъкидланишича, ФНҚИЗ мутахассисларининг кўп йиллик тажрибаси туфайли янги катализатор ГДС қурилмаси реакторига “Axens” компанияси мутахассислари иштирокисиз мустақил равишда ўрнатилди. Кейинчалик тегишли ишга тушириш-созлаш ишлари амалга оширилгач, саноат миқёсида ишлаб чиқариш йўлга қўйилди.
Шунингдек, экологик тоза ва сифатли “Eвро-4” стандартидаги дизель ёқилғиси учун мувофиқлик сертификати қўлга киритилди.