ТОШКЕНТ, 17 мар — Sputnik. Самарқанд туман ҳокимлигида ўтказилган сайёр судда бир неча йилдан буён алимент тўламай келаётган беш ота панжара ортига жўнатилди.
“Зарафшон” нашри хабарига кўра, фуқаролик ишлари бўйича Тойлоқ туманлараро судининг қарори билан фуқаро У.Б. ўз фарзанди учун алимент тўлаши белгиланган. Бироқ у 25 ойдан буён алимент пулларини тўламаган ва 19 миллион 161 минг сўм алимент қарздорлиги келиб чиққан.
Натижада унга нисбатан Маъмурий жавобгарлик тўғрисидаги кодекснинг 47-4-моддасига асосан маъмурий иш қўзғатилган. Жиноят ишлари бўйича Самарқанд туман судининг 2021 йил 11 мартдаги қарорига асосан У.Б.га 15 сутка қамоқ жазоси тайинланди.
Бундан ташқари, яна тўрт ота алиментларни ўз вақтида тўламаганлиги учун худди шу муддатга қамалган. Уларнинг қарздорлиги 6 миллиондан 24 миллион сўмгача бўлган.
Маслаҳат ва суҳбатлардан ўзига тўғри хулоса чиқарган қарздор ота Ш.Х. икки нафар фарзандининг келажаги учун турмуш ўртоғи Ш.Р. билан ярашган.