ТОШКЕНТ, 17 мар — Sputnik. Наманган вилоятида номаълум махлуқнинг скелети топилди.
Ноёб топилма Наманган тумани Қоратепа қишлоғида Убайдуллаев Нажмиддин хонадонида аниқланган. Хонадон эгаси иссиқхона ташкил этиш мақсадида қазиш ишларини олиб бораётган вақтда бус-бутун ҳолда сақланган номаълум ҳайвон суяк қолдиқларига дуч келган.
Наманган вилоят тарихи ва маданияти давлат музейи ходимлари, Наманган давлат университети олимлари биргаликда олиб борган текшириш хулосаларига кўра, мазкур ҳайвон скелети диназаврларнинг индрокатерий турига мансуб йирик сут эмизувчи эканлиги тахмин қилинмоқда.
Текшириш ишларини Музей ходимлари Каримов М., Каримов И., Наманган давлат университетининг археология кафедраси археологи Шукурулло Насриддинов ва биология кафедраси доценти Эркин Икромовлар олиб борган.
Эслатиб ўтамиз, аввалроқ Ўзбекистон Қизилқум чўлида фанга маълум бўлмаган динозавр тури қолдиқлари топилгани хабар қилинган эди.