ТОШКЕНТ, 9 мар — Sputnik. Самбо бўйича 2021 йилги Осиё чемпионати Тошкентда ўтказилади. Бу ҳақда Осиё самбо уюшмасининг навбатдаги онлайн йиғилишида маълум бўлди.
Жисмоний тарбия ва спорт вазирлиги матбуот хизмати хабарига кўра, аслида мазкур мусобақага белгиланган режа бўйича Индонезия мезбонлик қилиши лозим эди. Аммо шу йили ташкил этиладиган Соҳил ўйинлари сабаб ушбу мусобақани бошқа мамлакатга кўчиришга қарор қилинган.
Ўзбекистон самбо ассоциацияси мусобақани ўтказиш учун ариза берган ва йиғилишда жорий йил июнь ойида ўсмирлар, ёшлар ва катталар ўртасидаги Осиё чемпионатини Тошкентда ўтказиш таклифи муҳокама қилинган.
“Йиғилиш иштирокчиларнинг аксарият қисми ушбу таклифни қўллаб-қувватлашди. Шу тариқа, бу йилги Осиё чемпионати пойтахтимиз Тошкентда ўтказиладиган бўлди”, - дейилган хабарда.
Йиғилиш давомида Ўзбекистон самбо ассоциацияси раиси Алишер Алимов ҳам сўзга чиқиб, билдирилган ишонч учун миннатдорлик билдирди ва ушбу мусобақа юқори савияда ташкил этилишини маълум қилди.