ТОШКЕНТ, 1 мар - Sputnik. Тошкент туғруқхоналарида ишлайдиган 14 нафар мансабдор шахс жавобгарликка тортилди, деб хабар қилмоқда Давлат хизматлари агентлиги матбуот хизмати.
Хабарда айтилишига кўра, бунга ушбу ходимларнинг туғруқхоналарда бола туғилиши ва ўлим ҳолатларини қайд этиш билан боғлиқ мажбуриятларини қонунда белгиланган тартибда бажармаганлиги сабаб бўлган.
Хусусан, 2021 йилнинг январь ойида 390та туғилиш ва 3та перинатал ўлим ҳақидаги маълумотлар ахборот тизимига киритилмаган бўлса, туғилганлик ҳақидаги 888 та маълумот - муддатдан кечиктириб киритилган.
Аниқланган ҳолатлар юзасидан, 14 нафар мансабдор шахсга нисбатан маъмурий жарима жазо чораси қўлланилди.
Эслатиб ўтамиз, Ўзбекистон gрезидентининг 2018 йил 12 июндаги ПҚ–3785-сонли “Фуқаролик ҳолати далолатномаларини қайд этиш тизимини янада такомиллаштириш чора-тадбирлари тўғрисида”ги қарорига асосан 2019 йилдан бошлаб тиббиёт муассасалари ва ФҲДЁ органлари ўртасида туғилиш ва ўлим ҳақида электрон маълумот алмашиш тизими жорий этилган эди.
Шунингдек, Вазирлар Маҳкамасининг 2020 йил 10 ноябрдаги 704-сон қарорига асосан, тиббиёт муассасаси томонидан ота-она ва бола ҳақидаги барча маълумотларни электрон шаклда “Туғилиш ва ўлимни, шу жумладан перинатал ўлимни электрон рўйхатга олиш” автоматлаштирилган ахборот тизимига киритиши ва маълумотлар автоматик тарзда ФҲДЁ бўлимига юборилиши белгиланган.