ТОШКЕНТ, 26 янв - Sputnik. Олий Мажлис қонунчилик палатасида 25 январ куни йил охирида бўлиб ўтиши режалаштирилаётган президент сайловларини октябр ойига кўчириш тўғрисидаги янги қонун лойиҳаси биринчи ўқишда кўриб чиқилган эди.
Муҳокамада қайд этилишига кўра, президент сайловини декабр ойининг учинчи декадасида ўтказиш – сайловдан кейинги муҳим сиёсий тадбирларнинг ва бошқа ислоҳотларнинг кечиктиришига сабаб бўлади.
“Шу боис, қонун лойиҳасига кўра, сайловларни октябрь ойи учинчи ўн кунлигининг биринчи якшанбасида ўтказиш таклиф этилмоқда”, - дейилган хабарда.
Ундан ташқари, депутатлар томонидан таклиф қилинган янги қонун лойиҳасида, партиялар сайлов кампаниясини молиялаштириш, чет элда бўлиб турган Ўзбекистон фуқароларини ҳам сайловда иштирок этишини таъминлаш, сайловолди ташвиқоти қоидаларига ўзгартириш киритишга доир ўзгартиришлар киритилган.