ТОШКЕНТ, 26 янв — Sputnik. Тожикистон COVID-19 устидан тўлиқ ғалаба қозонди. Бу ҳақда мамлакат президенти Эмомали Раҳмон 26 январь куни парламентга йўллаган мурожаатномасида маълум қилди, дея ёзади Sputnik Тожикистон.
“Ҳозир Тожикистонда коронавирус йўқ, у бизда тўлиқ йўқ қилинди”, - деди Раҳмон.
Давлат раҳбари аҳоли хавфсизлик чораларига риоя қилиши зарурлигини таъкидлади.
“Бепарво бўлмаслигимиз ва шахсий гигиена қоидалари ҳақида унутиб қўймаслигимиз зарур”, - дея қўшимча қилди у.
Тожикистон ССВ маълумотларига кўра, мамлакатда 15 кундан буён коронавирус билан касалланиш аниқланмаяпти.
25 январь ҳолатига кўра республикада 13 308 киши коронавирус билан касалланган, шулардан 13 218 нафари (99,3 фоизи) тузалиб кетган. Коронавирусдан 90 киши вафот этган.