ТОШКЕНТ, 27 дек — Sputnik. 26 декабрь соат 16:00дан бошлаб Тошкент метрополитенининг Сергели йўналиши хизмат кўрсата бошлади.
“Ўзбекистон темир йўллари” матбуот хизмати хабарига кўра, йўналиш ишга тушгандан бошлаб 2021 йил 1 январь соат 8:00 га қадар ушбу йўналишда янги очилган “Бекат-1”, “Бекат-2”, “Бекат-3”, “Бекат-4”, “Бекат-5” бекатларида ҳаракатланиш бепул бўлади.
Бепул ҳаракатланиш фақат янги Сергели йўналишида амал қилади. Агар йўловчи Чилонзор йўналишидан (Олмазор бекатидан ҳам) ҳаракатланса, йўл ҳақи тўлаши зарур.
Эслатиб ўтамиз, 26 декабрь куни Тошкент метрополитенининг Сергели йўналиши очилган эди. Узунлиги 7 километрлик мазкур темир йўлда бешта бекат барпо этилган. Метрополитеннинг “Олмазор” бекати билан оралиқда 580 метрлик тоннел қурилиб, ер усти ва ер ости йўллари боғланган.