ТОШКЕНТ, 21 дек — Sputnik. Беларусь хорижий давлатлардан биринчи бўлиб коронавирусга қарши Россиянинг “Спутник V” вакцинасини рўйхатга олди. Бу ҳақда Россия тўғридан-тўғри инвестициялар жамғармаси (РФПИ) хабар қилди.
“РФПИ Беларусь Республикаси Соғлиқни сақлаш вазирлиги томонидан коронавирусга қарши Россиянинг “Спутник V” вакцинасига рўйхатга олинганлик гувоҳномаси берилганини маълум қилади. Шундай қилиб, Беларусь ўз ҳудудида вакцинани расман рўйхатга олган биринчи хорижий давлат бўлди”, - дейилган хабарда.
Таъкидланишича, ҳозир мамлакатда вакцинани ишлаб чиқаришни йўлга қўйиш борасида иш олиб борилмоқда.
Беларусга “Спутник V” вакцинасининг биринчи партияси сентябрь охирида етказиб берилган эди. Кўнгиллиларни эмлаш 1 октябрдан бошланган.