ТОШКЕНТ, 19 ноя — Sputnik. Россия меҳнат мигрантлари касаба уюшмаси раиси Ренат Каримов Москвадаги меҳнат муҳожирлари етишмовчилиги масаласига уларнинг ойлик маошини икки баробар ошириш орқали ечим топиш мумкинлиги ҳақида баёнот билан чиқди, деб хабар қилмоқда Жамоатчилик хизмати хабарлари.
Москвада биринчи қор ёғиши билан, шаҳарда коммунал хизматлар фаолиятидаги камчиликлар кўзга ташланиб қолди.
Каримовнинг сўзларига кўра, бу қисман Москва ЖКХ тузилмасида меҳнат қилган аксарият мигрантларнинг коронавирус пандемияси туфайли кетганлиги билан боғлиқ. Сўнгги маълумотларга кўра, меҳнат муҳожирлари сони 40%га камайган.
Меҳнат муҳожирлари касаба уюшмаси раҳбарининг таъкидига кўра, сўнгги ойларда қўшни мамлакатлардаги ишчиларга бўлган талаб анчайин ошган. Агар дворникларга икки карра кўп маош берилса, улар икки карра кўп ишларни бажаради, деб қўшимча қилган у.
"Дворниклар ҳам одам. Улар узоқ муддат маошсиз ўтиришди. Бир нечта бошқарувчи компаниялар бизга ишчиларни бериш илтимоси билан чиққан эдилар. Аммо бизда ҳам бўш ўтирган кадрлар йўқ", - деган Каримов.
У шунингдек, дворниклар иш оғирлиги учун бўшаб кетишмаганини ҳам эслатди.
"Улар уйларига кетмоқда. Янги ишчилар эса келмаяпти. Кетганлар кетаяпти, келишга эса рухсат йўқ. Мана муаммо қаерда", - деган касаба уюшмаси раҳбари.
РФ бош вазир ўринбосари Марат Хуснуллинга кўра, кўпчилик ҳукуматга мигрантлар учун Россияга йўлни очишни сўраб, мурожаат қилишмоқда.
Аммо Россия ҳукумати коронавирус билан боғлиқ вазият стабиллашмай туриб, таваккалчиликка йўл қўймасликка қарор қилган.