ТОШКЕНТ, 6 ноя - Sputnik. Фарғона вилоятида "Евро 4" ва "Евро 5" дизель ёқилғисини ишлаб чиқариш бошланди, деб хабра қилмоқда Энергетика вазирлиги.
"Бугун 5 ноябрь куни Фарғона нефтни қайта ишлаш заводида «Евро 4» ва «Евро 5» маркали дизел ёқилғисини ишлаб чиқаришга старт бериш тадбири бўлиб ўтди", - дейилган хабарда.
Тадбирда Энергетика вазири ўринбосари Беҳзот Нарматов, Фарғона вилояти ҳокими Хайрулла Бозоров, Jizzakh Petroleum бош директори Шокир Файзуллаев, ФНҚИЗ директори Хабиб Латипов ва оммавий ахборот воситалари вакиллари иштирок этди.
Эслатиб ўтамиз, Вазирлар Маҳкамаси томонидан 2010 йил 2 июнда “Фарғона нефтни қайта ишлаш заводини модернизация қилиш” тўғрисидаги қарори қабул қилинган эди. Унга кўра корхонада инвестиция лойиҳасини босқичма-босқич амалга ошириш ишлари олиб борилмоқда.
Айни пайтда мазкур заводнинг ГДС қурилмаси (дизел ёқилғисини гидротозалаш)даги 1,3 миллион АҚШ доллар қийматли катализатор алмаштириш йўли билан биринчи босқич ишлари амалга оширилиб "Евро 4" ва "Евро 5" маркали дизел ёқилғисини ишлаб чиқариш йўлга қўйилди.
"Евро 4 ва "Евро 5" стандартига жавоб берадиган дизел ёқилғиси — ёқилғининг ёниш жараёнини такомиллаштириш ва унинг сарфини камайтириш, шовқин, тебраниш ва коррозия тезлигини пасайтириш, двигателни ишга туширишни осонлаштириш каби афзалликларга эга.