ТОШКЕНТ, 19 окт — Sputnik. Ўзгидромет ҳафталик об-ҳаво маълумотини эълон қилди.
Бугун ва эртага Ўзбекистон ҳудудига қуруқ ва иссиқ ҳаво массаси таъсир этиши кузатилади. Республикада кам булутли об-ҳаво давом этади, кундузи ҳаво ҳарорати 24-27 даражагача кўтарилади, бу эса шу кунларнинг иқлимий меъёридан 4-5 даражага юқори.
21 октябрь куни республиканинг шимолий ҳудудлари Ғарбий Қозоғистон орқали Волга бўйи устидан вужудга келган совуқ ва нисбатан нам ҳаво массаси кириб келади. Қорақалпоғистон ва Хоразм вилоятида булутлар кўпаяди, кечқурун эса шамолнинг тезлиги 15-20 м/с гача эсиб, қисқа муддатли ёмғир ёғиши мумкин. Республиканинг қолган қисмида қуруқ, кам булутли об-ҳаво кутилмоқда.
22-23-октябрь кунлари салқин ҳаво бутун Ўзбекистон ҳудудига тарқалади. Республиканинг барча ҳудудларида булут қоплами ортиши, тоғолди ва тоғли ҳудудларда айрим жойларда ёмғир ёғиши, баланд-баланд жойларда эса ёмғир қорга айланиши мумкин. Республиканинг айрим вилоятларида шамолнинг тезлиги 15-20 м/с га етиши мумкин.
Ҳаво ҳарорати аста-секин пасайиб боради ва кечаси 3-8 даража илиқни, шимолда 0-3 даражагача совуқ ва кундузи 13-18 даражани иссиқни ҳосил қилади, бу эса шу кунлар учун ҳарорат меъёрларидан 3-5 даражага паст бўлади.