ТОШКЕНТ, 1 окт — Sputnik. Тошкентда “Lacetti” ҳайдовчиси олтита автомобилга шикаст етказиб, симёғочга бориб урилди. Бу ҳақда ИИВ ЙҲХББ матбуот хизмати хабар қилмоқда.
Йўл-транспорт ҳодисаси 1 октябрь куни соат 14:00 ларда Тошкентнинг Мирзо Улуғбек тумани Мустақиллик шоҳ ва Мовароуннаҳр кўчалари кесишмасида рўй берган.
Маълум қилинишича, хизмат олиб бораётган ЙПХ инспекторининг тўхташ ишорасига бўйсунмаган 30 ёшли ҳайдовчи Т.А. ҳаракатини давом эттириб, Мустақиллик шоҳ кўчаси бўйлаб юқори тезликда ҳаракатланган. Оққўрғон-Мустақиллик шоҳ кўчалари кесишмасига етган вақтида ўзидан олдинда бўлган “Matiz”, “Cobalt”, “Hyundai”, “Nexia”, “Spark” ва “Damas” автомобилларига техник шикаст етказган. Шундан сўнг йўлнинг қарама-қарши бўлагини ажратиб турувчи қисмида, тунги вақтда ёритиш учун ўрнатилган симёғочга урилиб тўхтаган.
Хабарда ЙТҲ натижасида тан жароҳати олганлар йўқлиги таъкидланган.
Мазкур ЙТҲ юзасидан Тошкент шаҳар ИИББ ЙҲХБ ходимлари дастлабки суриштирув ишларини олиб бормоқда.