ТОШКЕНТ, 12 сен - Sputnik. "Толибон" ҳаракати делегацияси Қатарда ўтказиладиган афғонлараро музокараларга етиб келди. Айни вақтда музокараларнинг очилиш маросими ўтказилмоқда.
Ўзбекистон Қатар пойтахти Доҳа шаҳрида Афғонистон Ҳукумати ва "Толибон" Ҳаракати ўртасида инклюзив музокаралар бошланганини олқишлаши ҳақида расмий баёнот эълон қилди.
ТИВ афғонлараро мулоқот ўт очишни барқарор тўхтатишга олиб келиши ва натижада мамлакатда мустаҳкам ва узоқ муддатли тинчликни ўрнатиш учун зарур шарт-шароитларни яратилишига умид билдирган.
"Ўзбекистон "сиёсий жараёнлар фақат афғонлар томонидан ва Афғонистон халқи раҳбарлигида олиб борилиши лозим", деган асосий тамойилга содиқ қолади", - дейилади баёнот матнида.
Шунингдек, Ўзбекистон томонларнинг миллий ярашувга эришиш йўлидаги саъй-ҳаракатлари ва интилишларини бундан кейин ҳам қўллаб-қувватлайди ҳамда дўст Афғонистон халқига барқарор ва фаровон давлат барпо этишда ҳар томонлама ёрдам кўрсатишда давом этишини қўшимча қилган.
Феврал ойи охирида Қатарда бўлиб ўтган маросимда АҚШ ва "Толибон" радикал харакати 18 йилдан ортиқ давом этган урушдан сўнг биринчи марта тинчлик битимини имзолаган эди. Куни кеча АҚШнинг Афғонистон бўйича махсус вакили Залмай Халилзод АҚШ бир-икки ойдан сўнг Афғонистондаги ҳарбий контингенти сонини 4,5 минг нафаргача қисқартириши ҳақида маълум қилди.