ТОШКЕНТ, 5 авг – Sputnik. Урғочи ва ҳудуд учун талашаётган икки каламушхўр илон олишуви видеоси интернетда фойдаланувчиларнинг қизиқишига сабаб бўлди.
Видеотасвир интернетга Ҳиндистон ўрмон хизмати офицери Сусанта Нанда томонидан жойланган.
Видео кадрларда акс этишига қараганда, олишув сув ичида бошланган.
Сўнгра судралувчилар сувдан чиқиб, қирққулоқлар ўсиб ётган ҳудудда жангни давом эттирган.
Нанданинг ёзишича, кўпчилик илонларнинг бу сингари ҳатти-ҳаракатини "жуфтлашиш удуми" сифатида қабул қилишга одатланган, бироқ бу ундай эмас.
Каламушхўр илонлар узунлиги икки ярим метргача етиши мумкин. Улар заҳарли эмас. Илонлар ўз ўлжасини бўғади.
Олдинроқ Жанубий Африка Республикасида жойлашган Крюгер паркида илон ва эчкиэмар ўртасида кечган ўлим жанги видеоси тарқалган эди.